បំពាក់ឋានន្តរសក្តិ និងគ្រឿងឥស្សរិយយស ជូនមន្ត្រីអាវុធហត្ថសោធននិវត្តន៍ និងពិការ ត្រៀមផ្ទេរចេញក្នុងឆ្នាំ២០២២
បន្ទាយមានជ័យ ៖ នៅថ្ងៃទី១៦ ខែវិច្ឆិកា ឆ្នាំ២០២២នេះ នៅបញ្ជាការដ្ឋានកងរាជអាវុធហត្ថខេត្តបន្ទាយមានជ័យ បានរៀបចំពិធីបំពាក់ឋានន្តរសក្តិ និងគ្រឿងឥស្សរិយយស ជូនមន្ត្រីអាវុធហត្ថសោធននិវត្តន៍ និងពិការ ចំនួន១១នាក់ ដែលត្រៀមផ្ទេរចេញក្នុងឆ្នាំ២០២២ ។
ពិធីនេះ ប្រព្រឹត្តទៅក្រោយអធិបតីភាពលោកនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលេីផ្ទៃប្រទេស តាមរយៈប្រព័ន្ធបញ្ជូនរូបភាព និងសម្លេង ( VIDEO CONFERENCE ), លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ រួមនឹងលោកមេបញ្ជាការរង លោកនាយសេនាធិការរង លោកប្រធានមន្ទីរទាំង៧ លោកមេបញ្ជាការមូលដ្ឋានកងរាជអាវុធហត្ថក្រុង-ស្រុកទាំង៩ ជាច្រើននាក់ទៀតផងដែរ ។
មានប្រសាសន៍នាឱកាសនោះ លោកឧត្តមសេនីយ៍ត្រី បោន ប៊ិន បានសំណេះសំណាល និងបានរំលឹកពីវរៈភាពដ៏អង់អាចក្លាហាន របស់យោធិននៃកងរាជអាវុធហត្ថខេត្ត ចូលសោធននិវត្តន៍ និងពិការ ដែលបានធ្វើពលីកម្ម យ៉ាងធំធេងក្នុងបុព្វហេតុ ការពារជាតិមាតុភូមិ ។ លោកបញ្ជាក់ថា ដោយមានការយកចិត្តទុក្ខដាក់ពីលោកនាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងរាជអាវុធហត្ថលេីផ្ទៃប្រទេស បេីទោះជាបីជាបងប្អូនយោធិនចូលនិវត្តន៍ យ៉ាងណាក៏ដោយ ក្នុងនាមអាវុធហត្ថ នៅតែជាគ្រួសារតែមួយ និងនៅបន្តគិតគូរពីសុខទុក្ខរបស់បងប្អូនជានិច្ច ដោយមិនទុកបងប្អូនចោលឡេីយ ។
បន្ទាប់ពីបំពាក់ឋានន្តរសក្តិ គ្រឿងឥស្សរិយយស ជូនយោធិននៃកងរាជអាវុធហត្ថសោធននិវត្តន៍ ចំនួន០៨រូប និងពិការចំនួន០៣រូប លោកនាយឧត្តមសេនីយ៍ សៅ សុខា ក៏បានឧបត្ថម្ភថវិកា លេីកទឹកចិត្តជូនយោធិនក្នុងម្នាក់៥០ម៉ឺនរៀល ព្រមជាមួយគ្នានោះ ចំពោះយោធិន នៃកងរាជអាវុធហត្ថសោធននិវត្តន៍ និងពិការ នៅក្នុងបញ្ជាការដ្ឋានអាវុធហត្ថខេត្តបន្ទាយមានជ័យ ទាំង១១រូប លោកឧត្តមសេនីយ៍ត្រី បោន ប៊ិន ក៏បានចូលរួមឧបត្ថម្ភថវិកា លេីកទឹកចិត្តក្នុងម្នាក់៤០ម៉ឺនរៀលផងដែរ ៕
