អគ្គិភ័យកំពុងលេបត្របាក់ក្លឹបមួយកន្លែងនៅកណ្តាលក្រុងបាត់ដំបង
ខេត្តបាត់ដំបង! ព័ត៌មានបឋមុននេះបន្តិចមានករណីអគ្គីភ័យកើតឡើងបាននិងកំពុងឆាបឆេះទៅលើក្លឹបមួយកន្លែងយ៉ាងសន្ធោសន្ធៅនៅវេលាម៉ោង១៦និង៥០ នាទី ថ្ងៃទី០៤ ខែវិច្ឆិកា ឆ្ឆ្នា២០២២ នៅចំណុចក្រុមទី៣៨ ស្ថិតក្នុងភូមិ២០ឧសភា សង្កាត់ស្វាយប៉ោ ក្រុងបាត់ដំបង។
សមត្ថកិច្ចបានអោយដឹងថា ក្លឹបដែលត្រូវអគ្គិភ័យឆាបឆេះខាងលើមានយីហោ LOL ចំនួន០១ខ្នង ដែលមានទំហំ ១៦X២០ម៉ែត្រ មានកម្ពស់បីជាន់ សង់អំពីបេតុង(ផ្ទះល្វែង) ដែលមានម្ចាស់ឈ្មោះ ប៉ូយ សុខុម ភេទប្រុស អាយុ៤២ឆ្នាំ រស់នៅកន្លែងកើតហេតុខាងលើ ហើយចំពោះករណីអគ្គិភ័យនេះដែរគឺបណ្តាលមកពីឆ្លងចរន្តអគ្គិសនី ចំណែកទំហំនៃការខូចខាតនៅមិនទាន់ដឹងច្បាស់នៅឡើយទេ។
នៅក្នុងហេតុការណ៍អគ្គីភ័យខាងលើនេះដែរគេសង្កេតឃើញរថយន្តពន្លត់អគ្គិភ័យចំនួន៤គ្រឿង ដែលដឹកនាំផ្ទាល់ដោយឯកឧត្តមឧត្តមសេនីយ៍ទោ សាត គឹមសាន ស្នងការនគរបាលខេត្តបាត់ដំបង ក៏ដូចជាលោក ផេង សិទ្ធី អភិបាលក្រុង និងលោកអធិការក្រុងស្រុកផងដែរបានចុះអន្តរាគមន៍បាញ់ពន្លត់ ដោយប្រើប្រាស់ទឹកអស់ចំនួន០៨រថយន្តទើបគ្រប់គ្រងបានទាំងស្រុង និងមិនបណ្តាលអោយមានគ្រោះថ្នាក់ដល់មនុស្សផងដែរ។
