រថយន្ត TACOMA បោះពួយលឿន ហក់ឡើងឃឿន បុករះបង្គោលទង់ជាតិ ដួលរលំខូចខាតយ៉ាងដំណំ

បាត់ដំបង ៖ យុវជនម្នាក់ បើករថយន្តក្នុងល្បឿនលឿន បានរ៉េចង្កូតហក់ឡើងឃឿនផ្លូវ បុករះបង្គោលទង់ជាតិដាក់លំអវត្ត បណ្តាលអោយដួលរលំ ខូចខាតអស់ជាច្រើនដើម នៅវេលាម៉ោង ១១និង១៥នាទី ថ្ងៃទី៣០ ខែតុលា ឆ្នាំ ២០២២ នៅចំណុចខាងមុខវត្តពោធិវង្ស ស្ថិតក្នុងភូមិចំការសំរោង១ សង្កាត់ចំការសំរោង ក្រុងបាត់ដំបង ។

ប្រភពនៅកន្លែងកើតហេតុ បានប្រាប់ថា នៅមុនពេលកើតហេតុ គេឃើញរថយន្ត TACOMA ពណ៍សមួយគ្រឿង ពាក់ផ្លាកលេខ បាត់ដំបង 2B-8477 បើកបរដោយយុវជនម្នាក់ធ្វើដំណើរចេញពីទីតាំងលាងរថយន្តមួយកន្លែងទិសដៅពីកើតទៅលិច ក្នុងល្បឿនយ៉ាងលឿន លុះមកដល់ចំណុចកើតហេតុក៏បានរ៉េចង្កូតហក់ឡើងឃឿនផ្លូវជ្រុលបុករះបង្គោលដងទង់ជាតិដាក់តាំងលំអខាងមុខវត្តបណ្តាលអោយដួលរលំខូចខាតអស់ជាច្រើនដើម តែមិនបណ្តាលអោយមានគ្រោះថ្នាក់ដល់មនុស្សឡើយ។

ក្រោយពេលកើតហេតុ យុវជនខាងលើបានព្យាយាមបើករថយន្តគេចចូលយានដ្ឋាន ជាង រតនា ដើម្បីធ្វើការជួសជុលតែត្រូវបានសមត្ថកិច្ចជំនាញចុះទៅដកហូតយករថយន្តទៅរក្សាទុកនៅការិយាល័យចរាចរណ៍ផ្លូវគោកដើម្បីរងចាំម្ចាស់ចូលខ្លួនមកដោះស្រាយតាមផ្លូវច្បាប់។ ៕