ពលរដ្ឋ​ខណ្ឌ​ដង្កោ​ក្ដៅ​ក្រហាយ​ រថយន្ត​ដឹក​ដី​ ក្រុមហ៊ុន​ លី គឹម​ហេង ​និង​ក្រុម​ហ៊ុន​ ទ្រី សៀម៉ី កំពុង​បំផ្លាញ​ផ្លូវ​សាធារណៈ ​និង​ប៉ះពាល់​បរិស្ថាន​​

129

ភ្នំពេញ ៖ ដោយសារតែ​ទ្រាំ​មិនបាន​ទៅ​និង​សកម្មភាព​ដឹក​ដី​បំផ្លាញ​ផ្លូវ​សាធារណៈ និង​ប៉ះពាល់​បរិស្ថាន ប្រជាពលរដ្ឋ​រស់នៅ​ខណ្ឌដង្កោ បាន​ប្រតិកម្ម សម្រេចចិត្ត​លើកគ្នា​បិទផ្លូវ​មិន​អោយ​ក្រុម​រថយន្ត​ដឹក​ដី ក្រុម​ហ៊ុន​ លី គឹម​ហេង និង​ក្រុម​ហ៊ុន ទ្រី សៀ​ម៉ី​ និង​ក្រុមហ៊ុន ៣​ទៅ​៤​ផ្សេងទៀត មិន​អោយ​បើកបរ​ឆ្លងកាត់​ក្នុង​ភូមិ​របស់​ពួកគាត់ ​បន្តទៀត ។

ការផ្ទុះ​តវ៉ា ​របស់ពលរដ្ឋ ​កើតឡើង កាល​ពី​វេលា​ ​ថ្ងៃទី ១៧ ខែធ្នូ ឆ្នាំ​២០១៩ ​ម្សិលមិញនេះ ​នៅ​ចំណុច​ផ្លូវលំ សង្កាត់​សាក់​សំពៅ ខណ្ឌដង្កោ រាជធានី​ភ្នំពេញ ។

មន្ត្រី​អាជ្ញាធរ​សាលាសង្កាត់​សាក់​សំពៅ​ បាន​លើកឡើងថា ​​ម្ចាស់​ក្រុម​ហ៊ុនធំៗ ដែលមាន​រថយន្ត​ដឹក​ដី​ធ្វើ​អោយ​ផ្លូវ​ខូចខាត​សាធារណៈ ​និង​បង្ក​ផល​ប៉ះពាល់​ដល់​ការរស់នៅ​របស់​ប្រជាពលរដ្ឋ ​ចំនួន ២ ក្រុមហ៊ុន រួមមាន​ ក្រុម​ហ៊ុន​ លី គឹម​ហេង ​និង​ក្រុម​ហ៊ុន​ ទ្រី សៀ​ម៉ី​ និង​មាន ៣​ទៅ ៤ក្រុម​ហ៊ុន​​ផ្សេងទៀត​ ផងដែរ ​បច្ចុប្បន្នកំពុង​បើកប​រដឹក​ដី​រថយន្ត​ដឹក​ដី​ឆ្លងកាត់​មូលដ្ឋាន​ខណ្ឌដង្កោ ។

ដោយឡែក​បើ​តាម​សម្តី​ប្រជាពលរដ្ឋ​ ដែល​ឈរ​បិទផ្លូវ ​បានឲ្យ​ដឹងថា ​ជា​រៀងរាល់ថ្ងៃ​ពួកគាត់​ពិបាក​ក្នុង​ការ​រស់នៅ​ណាស់ ដោយសារ​មួយថ្ងៃៗ​ ឃើញ​រថយន្ត​ដឹក​ដី​ជាច្រើន​គ្រឿង ​បាន​បើកបរ​ឆ្លងកាត់​ក្នុងភូមិ​គាត់​ក្នុង​ល្បឿន​លឿនៗ ​ហើយ​ហុយ​ដី ​ពេលខ្លះ​ ហូបបាយ​ស្ទើរ​មិនកើត​ ពីព្រោះ​ដី​ហុយ​ខ្លាំងពេក ។

ដោយសារ​បញ្ហា​នេះ ប្រជាពលរដ្ឋ​សំណូមពរ​អាជ្ញាធរ​ខណ្ឌ​ដង្កោ ​មេត្តាជួយ​ណែនាំ​ក្រុម​ហ៊ុន​ ​ដឹក​ដី​ទាំង​អស់នោះ ​កុំអោយ​បើកបរ​រថយន្ត​លឿនៗ​ ពេក ហើយ​ត្រូវ​គ្រប​ឲ្យ​បាន​ត្រឹមត្រូវ ជាពិសេស សូម​ជួយ​ស្រោច​ទឹក​នៅ​លើ​ដងផ្លូវ​អោយ​ញឹកញាប់​ផង ​ ដើម្បី​កុំ​អោយ​ដី​ហុយ​ទ្រលោម​បែបនេះ​ទៀត ។

សូម​បញ្ជាក់​ថា ​​ក្រោយពី​មាន​ផ្ទុះ​បាតុភាព​បិទផ្លូវ​បែបនេះ​ លោក ជរ គឹមស៊​រ អភិបាលរង​ខណ្ឌដង្កោ បាន​ដឹកនាំ​កម្លាំង​ ចុះ​អន្តរាគមន៍​សម្របសម្រួល​ជាមួយ​ប្រជាពលរដ្ឋ​ នឹង​បានសម្រេច​ផ្អាក​ការ​ដឹកជញ្ជូន​ដី​មួយរយៈពេល​សិន ដើម្បី​រក​ដំណោះស្រាយ​ណាមួយ​អោយ​សមស្រប​ ទើប​អនុញ្ញាត​​អោយ​ក្រុមហ៊ុន​ដឹក​ដី​ទាំងអស់នោះ​ បន្ត​អាជីវកម្ម​បន្តទៀត ៕

ដោយ ៖ សហការី 068 59 4000

ចំណែក