រយៈពេល៩ខែ កម្ពុជានាំចេញផលិតផលកាត់ដេរ មានកំណើន ២៤.៥ភាគរយ
ភ្នំពេញ៖ ក្នុងរយៈពេល៩ខែ កម្ពុជានាំចេញផលិតផលកាត់ដេរ មានតម្លៃសរុប ១០.២៥ពាន់លានដុល្លារ ឆ្នាំ២០២២នេះ មានកំណើន ២៤.៥ភាគរយ ធៀបនឹងរយៈពេលដូចគ្នាកាលពីឆ្នាំមុន។
យោងតាមរបាយការណ៍របស់អគ្គនាយកដ្ឋានគយ និងរដ្ឋាករ ការនាំចេញផលិតផលកាត់ដេរ រួមមាន៖ សំលៀកបំពាក់ ស្បែកជើង និងផលិតផលធ្វើដំណើរ រួមចំណែក ៥៩ភាគរយ នៃការនាំចេញេសរុប ១៧.២៥ពាន់លានដុល្លារក្នុងរយៈពេល ចាប់ពីខែមករា ដល់ខែកញ្ញាឆ្នាំនេះ។
របាយការណ៍ដដែល បង្ហាញថា ការនាំចេញផលិតផលវិនិយោគមិនមែនកាត់ដេរ (ដូចជា គ្រឿងបំណែកអេឡិចត្រូនិក បង្គុំខ្សែភ្លើង កង់ គ្រឿងបន្លាស់រថយន្ត អំពូលលម្អ ផលិតផលពីឈើ កុងផ្លាកេ ផលិតផលពីប្លាស្ទិក ស្បែកសត្វកែច្នៃ និងផលិតផលផ្សេងៗទៀត) មានចំនួន ៤ ១៨៧,៥ លានដុល្លារអាមេរិក កើនឡើងប្រមាណ ៨០៨,២ លានដុល្លារអាមេរិក ស្មើនឹង ២៣,៩%។
ដោយឡែក ការនាំចេញកសិផលមានចំនួន ២ ២២៧,៥ លានដុល្លារអាមេរិក កើនឡើងប្រមាណ ១២២,៣ លានដុល្លារអាមេរិក ស្មើនឹង ៥,៨% ដែលក្នុងនោះ ស្រូវនាំចេញមានតម្លៃ ៥០៣,៦ លានដុល្លារអាមេរិក ការនាំចេញអង្ករមានតម្លៃ ២៩១,៥ លានដុល្លារអាមេរិក កៅស៊ូនាំចេញមានតម្លៃ ២៧២,៨ លានដុល្លារអាមេរិក និងកសិផលផ្សេងទៀតមានតម្លៃ ១ ១៥៩,៧ លានដុល្លារអាមេរិក ។
សូមបញ្ជាក់ថា ទំហំនៃការនាំចេញក្នុងរយៈពេល ៩ខែ ឆ្នាំ២០២២ សម្រេចបាន ១៧.២៥ ពាន់លានដុល្លារ កើនឡើង ២២.១ភាគរយ ធៀបនឹងរយៈពេលដូចគ្នាក្នុង ឆ្នាំ២០២១៕
