ឆ្លងចរន្តអគ្គិសនី ឆេះបន្ទប់ហាត់របាំសាលានេតយ៉ង់ ផ្អើលទាំងសិស្ស និងសមត្ថកិច្ចចេញអន្តរាគមន៍ពន្លត់

បាត់ដំបង ៖ ឆ្លងចរន្តអគ្គិសនីបង្កជាអគ្គិភ័យឆាបឆេះបន្ទប់ហាត់របាំក្នុងសាលានេតយ៉ង់ផ្អើលទាំងសិស្សនិងសមត្ថកិច្ចចេញអន្តរាគមន៍ពន្លត់នៅវេលាម៉ោង ១៨ និង២០នាទី ថ្ងៃទី០៩ ខែមករា ឆ្នាំ២០២៥ នៅត្រង់ចំណុចក្រុមទី០៦ ភូមិព្រែកព្រះស្តេច សង្កាត់ព្រែកព្រះស្តេច ក្រុងបាត់ដំបង ។

សមត្ថកិច្ចបានបញ្ជាក់ថា ករណីអគ្គិភ័យខាងលើនេះដែរបណ្តាលអោយឆេះបន្ទប់ហាត់របាំរបស់សាលា ០១បន្ទប់ ទំហំ ៨ម៉ែត្រ × ១៦ម៉ែត្រ សង់អំពីបេតុង ( ជាន់ទី៣) ស្ទើរទាំងស្រុង និងឆេះតុឈើចំនួន ០៤ ,ឆេះកៅអីចំនួន ០១ ,ឆេះកង្ហារពិដានចំនួន ០៣ និង សម្ភារសិក្សាផ្នែករបាំអស់ទាំងស្រុងផងដែរ។

ជាមួយគ្រោះអគ្គិភ័យខាងលើនេះដែរ ភ្លាមៗនោះ សមត្ថកិច្ចបានចេញរថយន្តពន្លត់អគ្គិភ័យចំនួន ០២គ្រឿង ដើម្បីជួយអន្តរាគមន៍ពន្លត់ ប៉ុន្តែពុំបានប្រើប្រាស់ទឹកនោះទេ ដោយសារបានប្រជាពលរដ្ឋជួយពន្លត់ទាន់ពេលមិនអោយឆេះរាលដាលបន្ត ៕

ដោយ ៖ សាលី