សង្ស័យបើកបរលឿន ជ្រុលចង្កូតទៅបុករថយន្តដែលកំពុងឆ្លងផ្លូវ បណ្តាលអោយរងរបួសធ្ងន់

បាត់ដំបង ៖ បុរសម្នាក់បានរងរបួសធ្ងន់ ក្រោយជួបឧបទ្ទវហេតុគ្រោះថ្នាក់ចរាចរ ជិះម៉ូតូទៅបុករថយន្តនៅវេលាម៉ោង ៩និង៣០នាទី ថ្ងៃទី២៥ ខែធ្នូ ឆ្នាំ២០២៤ នៅត្រង់ចំណុចផ្លូវប្រសព្វហាយវេ ស្ថិតក្នុងក្រុមទី១០ ភូមិខ្សាច់ពោយ សង្កាត់វត្តគរ ក្រុងបាត់ដំបង ។

ពលរដ្ឋនៅកន្លែងកើតហេតុបានអោយដឹងថា ករណីគ្រោះថ្នាក់ចរាចរណ៍ខាងលើនេះដែរកើតឡើងរវាងរថយន្តម៉ាក HYUNDAI STAREX ពណ៌ទឹកប្រាក់ ពាក់ផ្លាកលេខ ភ្នំពេញ 2BR-9402 បើកបរដោយឈ្មោះ យី សំណាង ភេទប្រុស អាយុ ៥២ឆ្នាំ មុខរបររត់តាក់ស៊ី មានទីលំនៅខណ្ឌសែនសុខ រាជធានីភ្នំពេញ បើកបរក្នុងទិសដៅពីជើងទៅត្បូង(ឆ្លងផ្លូវ) ចំណែកម៉ូតូម៉ាកហុងដាឌ្រីម ពណ៌ខ្មៅ ពាក់ផ្លាកលេខ បាត់ដំបង 1AH-2097 បើកបរដោយឈ្មោះ វណ្ណ វិសាល ភេទប្រុស អាយុ ៣៤ឆ្នាំ មុខរបរ ធ្វើស្រែ មានទីលំនៅភូមិឈើទាល ឃុំឈើទាល ស្រុកបាណន់ ខេត្តបាត់ដំបង ទិសដៅពីលិចទៅកើត លុះមកដល់ចំណុចផ្លូវប្រសព្វខាងលើ បានជ្រុលចង្កូតបុករថយន្តពេញទំហឹងបណ្តាលអោយបោកក្បាលរងរបួសធ្ងន់តែម្តង។

ក្រោយពេលកើតហេតុជនរងគ្រោះត្រូវបានយកទៅសង្គ្រោះនៅមន្ទីរពេទ្យស្នងការនគរបាលខេត្ត ចំណែកមធ្យោបាយទាំងពីរត្រូវបានកម្លាំងជំនាញវាស់វែងធ្វើកំណត់ហេតុយកទៅរក្សាទុកនៅការិយាល័យនគរបាលចរាចរណ៍ផ្លូវគោកខេត្តដើម្បីរងចាំដោះស្រាយតាមផ្លូវច្បាប់ ៕

ដោយ ៖ សាលី