បុរស០៣នាក់ រងរបួសធ្ងន់ស្រាល ក្នុងហេតុការណ៍ម៉ូតូ ០២គ្រឿងបុកគ្នា

បាត់ដំបង ៖ យ៉ាងហោចណាស់បុរស០៣នាក់ បានរងរបួសធ្ងន់ស្រាល ក្រោយជួបឧបទ្ទវហេតុគ្រោះថ្នាក់ចរាចរណ៍ រវាងម៉ូតូ០២គ្រឿង បុកគ្នានៅវេលាម៉ោង ១៩និង៣៥នាទី ថ្ងៃទី២៨ ខែវិច្ឆិកា ឆ្នាំ២០២៤ នៅតាមបណ្តោយផ្លូវជាតិលេខ៥ ជិតស្តុបផ្សារថ្មីស្ថិតក្នុងភូមិរំចេក៤ សង្កាត់រតនះ ក្រុងបាត់ដំបង ។

ប្រភពនៅកន្លែងកើតហេតុ បានអោយដឹងថា ដំបូងគេឃើញម៉ូតូម៉ាកហុងដាឌ្រីមពណ៌ខ្មៅមួយគ្រឿង ពាក់ផ្លាកលេខបាត់ដំបង1M-8649 បើកបរដោយបុរសម្នាក់ទិសដៅពីលិចទៅកើត លុះមកដល់ចំណុចកើតហេតុខាងលើបានបត់ឆ្វេងឆ្លងផ្លូវ ភ្លាមនោះក៏មានម៉ូតូម៉ាកហុងដាឌ្រីមពណ៌ខ្មៅមួយគ្រឿងផ្សេងទៀត ពាក់ផ្លាកលេខ បាត់ដំបង1AF-1645 បើកបរដោយបុរសម្នាក់និងអ្នករួមដំណើរម្នាក់ទិសដៅពីកើតទៅលិច បានជ្រុលមកបុកគ្នាពេញទំហឹងបណ្តាលអោយរងរបួសធ្ងន់ស្រាលទាំង០៣នាក់ ចំណែកម៉ូតូខូចខាតយ៉ាងដំណំផងដែរ។

ក្រោយពេលកើតហេតុសមត្ថកិច្ចជំនាញបានចុះមកដឹកបញ្ជូនជនរងគ្រោះទៅសង្គ្រោះព្យាបាលនៅមន្ទីរពេទ្យ ចំណែកមធ្យោបាយទាំងពីរត្រូវបានវាស់វែងធ្វើកំណត់ហេតុយកទៅរក្សាទុកនៅការិយាល័យចរាចរណ៍ផ្លូវគោកដើម្បីរងចាំដោះស្រាយទៅតាមផ្លូវច្បាប់ ៕

ដោយ ៖ សាលី