បើកបរខ្វះការប្រុងប្រយ័ត្ន ជ្រុលបុកពីក្រោយរថយន្តធំ បណ្តាលអោយស្លាប់យ៉ាងអាណោចអាធ័ម

បាត់ដំបង ៖ បុរសម្នាក់បានស្លាប់យ៉ាងអាណោចអាធ័មក្រោយបើកបរខ្វះការប្រុងប្រយ័ត្នជ្រុលទៅបុកពីក្រោយរថយន្តធុនធំមិនស្គាល់ម៉ាកនៅវេលាម៉ោង ៣និង៣០នាទីទៀបភ្លឺ ឈានចូលថ្ងៃទី២៣ ខែវិច្ឆិកា ឆ្នាំ២០២៤ នៅលើកំណាត់ផ្លូវជាតិលេខ៥៧ ចំណុចវាលបឹងត្រាវ ស្ថិតក្នុងភូមិក្រពើកើត ឃុំភ្នំសំពៅ ស្រុកបាណន់  ខេត្តបាត់ដំបង ។

សមត្ថកិច្ចបានបញ្ជាក់ថា ករណីគ្រោះថ្នាក់ចរាចរណ៍ខាងលើនេះដែរកើតឡើងរវាងរថយន្តម៉ាកកាមារីឆ្លាមពណ៌ទឹកប្រាក់០១គ្រឿង ពាក់ស្លាកលេខ បាត់ដំបង 2B 8913 បើកបរដោយឈ្មោះ វេង ហុង ភេទប្រុស អាយុ 42ឆ្នាំ រស់នៅភូមិសូភី1 សង្កាត់រតនះ ក្រុងបាត់ដំបង ក្នុងទិសដៅពីលិចទៅកើត ដល់ចំណុចកើតហេតុខាងលើបានជ្រុលបុកពីក្រោយរថយន្តធុនធំមិនស្គាល់ម៉ាកបណ្តាលអោយស្លាប់ភ្លាមៗ ចំណែករថយន្តធុនធំបើកគេខ្លួនបាត់ស្រមោលតែម្តង។

ក្រោយពេលកើតហេតុសមត្ថកិច្ចជំនាញបានចុះទៅវាស់វែងធ្វើកំណត់ហេតុប្រគល់សពអោយសាច់ញាតិយកទៅធ្វើបុណ្យតាមប្រពៃណី ចំណែករថយន្តយកទៅរក្សាទុកនៅការិយាល័យជំនាញដើម្បីបន្តតាមនិតិវិធី ៕

ដោយ ៖ សាលី