គាស់ទ្វារផ្ទះបូរី ចូលលួចទ្រព្យសម្បត្តិ ត្រូវសមត្ថកិច្ចឃាត់ខ្លួន អនុវត្តតាមផ្លូវច្បាប់

បាត់ដំបង ៖ កម្លាំងជំនាញផ្នែកយុត្តិធម៌ នៃអធិការដ្ឋាននគរបាលក្រុងបាត់ដំបង នៅថ្ងៃទី៣០ ខែតុលា ឆ្នាំ ២០២៤ បានធ្វើការបង្ក្រាបករណី អំពើលួចមានស្ថានទម្ងន់ទោស ( គាស់ទម្លុះទម្លាយ) ចំនួន ២ករណី និងបានធ្វើការឃាត់ខ្លួនជនសង្ស័យចំនួន ០១នាក់។

សមត្ថកិច្ចបានបញ្ជាក់ថា ជនសង្ស័យត្រូវបានឃាត់ខ្លួនឈ្មោះ ផល សុខមាន ភេទប្រុស អាយុ២៣ឆ្នាំ មានទីលំនៅភូមិសាលាបាឡាត់ សង្កាត់អូរម៉ាល់ ក្រុងបាត់ដំបង ដែលជនសង្ស័យខាងលើ ករណីទី០១កាលពីថ្ងៃទី២៤ ខែតុលា ឆ្នាំ២០២៤ រូបគេបានធ្វើសកម្មភាពគាស់ដំបូលផ្ទះបូរី ហុក វណ្ណះ លួចសំភារ: គ្រឿងជាង និងករណីទី២ ថ្ងៃទី២៩ ខែតុលា ឆ្នាំ២០២៤ បានធ្វើសកម្មភាពគាស់ទ្វារផ្ទះបូរីសាច់អាំងចូលលួចម៉ូតូ។

ជាមួយកិច្ចប្រតិបត្តិការខាងលើនេះ សមត្ថកិច្ចដកហូតសំភារះរួមមាន ៖ ម៉ូតូ០១គ្រឿងម៉ាកហុងដាឌ្រីម ពណ៌ខ្មៅសេរីឆ្នាំ ២០១៥ ពាក់ស្លាកលេខ ភ្នំពេញ ១AM ៣០៩៩, កង់ពណ៌ខ្មៅ ចំនួន០១គ្រឿង, ស្វានបុកបេតុង ចំនួន០១គ្រឿង, ប៉ុសផ្សាដែក ចំនួន០១គ្រឿង ។

ក្រោយឃាត់ខ្លួន ជនសង្ស័យត្រូវបានផ្នែកជំនាញកសាងសំណុំរឿង ដើម្បីចាត់ការទៅតាមនីតិវិធីច្បាប់ ៕