សមត្ថកិច្ចបញ្ជូនខ្លួន បុរស០៥នាក់ ទៅសាលាដំបូងពាក់ព័ន្ធ ការជួញដូរមនុស្ស
បាត់ដំបង ៖ ជនសង្ស័យ ០៥នាក់ ត្រូវបានកម្លាំងនគរបាលខេត្តបាត់ដំបង ធ្វើការឃាត់ខ្លួន បញ្ជូនទៅតុលាការ ពាក់ព័ន្ធ ការជួញដូរមនុស្សខុច្បាប់ ។
សមត្ថកិច្ច បានឲ្យដឹងថា ជាការអនុវត្តបទបញ្ជារបស់លោក ឧត្តមសេនីយ៍ទោ ដាញ់ អេងប៊ុនចាន់ ស្នងការ និងមានការសម្របសម្រួលលើនីតិវិធីពី ឯកឧត្តម កែវ សុជាតិ ព្រះរាជអាជ្ញា នៃអយ្យការអមសាលាដំបូងខេត្តផងនោះ កាលពីថ្ងៃទី១០ ខែតុលា ឆ្នាំ២០២៤ វេលាម៉ោង ១៨និង៤៨នាទី នៅចំណុចក្រុមទី ២១ ភូមិកំពង់ព្រះ ឃុំកំពង់ព្រះ ស្រុកសង្កែ ខេត្តបាត់ដំបង សមត្ថកិច្ចនគរបាលផែនការងារព្រហ្មទ័ណ្ឌទាំងធ្ងន់ និងស្រាល រួមជាមួយកម្លាំងនៃអធិការដ្ឋាននគរបាលស្រុកសង្កែ បានធ្វើការងាររដ្ឋបាលនៅលើដងផ្លូវ និងបានឃាត់រថយន្ត ០១គ្រឿង ម៉ាកហ៊ីយ៉ាន់ដាយស្តារិចពណ៌ទឹកប្រាក់ ពាក់ផ្លាកលេខ ភ្នំពេញ 2AZ- 8139 ក្នុងនោះពិនិត្យឃើញមានជនជាតិចិន០១នាក់ ពេលនោះជនជាតិចិនរូបនេះក៏ បានសុំការអន្តរាគមន៍ដល់រូបគាត់កំពុងរងគ្រោះក្នុងករណី(ជួញដូរ)ដូចនេះសមត្ថកិច្ចបាននាំអ្នកទាំងអស់ មកធ្វើការសាកសួរនៅស្នងការ ហើយក្រោយសាកសួរគាត់ឆ្លេីយថា រូបគាត់ត្រូវគេនាំពីស្វាយរៀងទៅប៉ោយប៉ែត ក្នុងទម្រង់នៃការជូញដូរ។
ក្រោយពេលសាកសួរ ដឹងថា ជនជាតិចិនឈ្មោះ LI JIAN ភេទប្រុស អាយុ៤១ឆ្នាំ មានទីលំនៅមិនពិតប្រាកដ និងជនជាតិខ្មែរ ០៤នាក់ទៀត ១-ឈ្មោះ ហូ ថៃប្រសិទ្ធ ភេទប្រុស អាយុ ៣៩ឆ្នាំ មានទីលំនៅភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ(ជាអ្នកបើករថយន្ត ), ២-ឈ្មោះ នុត និមល ភេទប្រុស អាយុ ៥០ឆ្នាំ មានទីលំនៅភូមិព្រែកកំពឹស សង្កាត់ដង្កោ ខណ្ឌដង្កោ រាជធានីភ្នំពេញ, ៣-ឈ្មោះ ភឹម ច័ន្ទសីលា ភេទប្រុស អាយុ ១៨ឆ្នាំ មានទីលំនៅភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ, ៤-ឈ្មោះ ហៀង ម៉េង ភេទប្រុស អាយុ ៤៣ឆ្នាំ មានទីលំនៅ ខេត្តកំពង់ស្ពឺ ។
ផ្តើមពីការសាកសួរ និងដោយបានការសម្របសម្រួលពីឯកឧត្តម ព្រះរាជអាជ្ញា សមត្ថកិច្ចបានធ្វេីការទំនាក់ទំនងជាមួយសមត្ថកិច្ចខេត្តព្រះសីហនុ ឈានទៅធ្វេីការឃាត់ខ្លួនឈ្មោះ មោះ ស៊ាត គឹមហេង ភេទប្រុស អាយុ ២៥ឆ្នាំ ស្នាក់នៅបន្ទប់ជួលភូមិ៤ សង្កាត់៤ ក្រុង-ខេត្តព្រះសីហនុ និងបានចម្លេីយសារភាពថា មានជនជាតិចិនមិនស្គាល់មុខ (តាមតេឡេក្រាម) ឱ្យគាត់រកជួលរថយន្តដឹកជនជាតិចិនខាងលើ ពីខេត្តស្វាយរៀងទៅក្រុងប៉ោយប៉ែត ។
ក្រោយឃាត់ខ្លួន សមត្ថកិច្ចដកហូតបានវត្ថុតាងរួមមាន ៖ រថយន្តចំនួន០២គ្រឿង ម៉ាក ហ៊ីយ៉ាន់ដាយស្តារិច ពណ៌ទឹកប្រាក់ ពាក់ស្លាកលេខភ្នំពេញ 2AZ-8139 មួយគ្រឿង និងម៉ាក Lexus HS250H ពណ៌ខ្មៅ ពាក់ស្លាកលេខ ភ្នំពេញ 2BZ-8582 មួយគ្រឿង, ទូរស័ព្ទដៃ ០៩គ្រឿង, ខ្សែអង្រឹងមួយចំនួន, ខ្នើយ០១, កាតសារព័ត៌មាន ០៣, ដបទឹកសម្រាប់ដាក់ទឹកនោម ចំនួន ០៣ ដប ៕
ដោយ ៖ សាលី