មួកសុវត្ថិភាពមួយ ជួយការពារជីវិតបានម្នាក់
បន្ទាយមានជ័យ ៖ មួកសុវត្ថិភាពមួយ ជួយការពារជីវិតបានម្នាក់ នេះគឺជា សារលើកឡើងរបស់លោក សុក ចាន់ថា ប្រធានមន្ទីរសាធារណការនិងដឹកជញ្ជូនខេត្តបន្ទាយមានជ័យ ដើម្បីជាជំនួយស្មារតីស្តីពី ច្បាប់ចរាចរណ៍ផ្លូវគោក។
លោក សុក ចាន់ថា បានលើកឡើងក្នុងឱកាសដឹកនាំមន្ត្រីជំនាញមន្ទីរសាធារណការនិងដឹកជញ្ជូន សហការជាមួយសមត្ថកិច្ចចរាចរណ៍ នៃស្នងការដ្ឋាននគរបាលខេត្តបន្ទាយមានជ័យ ធ្វើការផ្សព្វផ្សាយព្រឹត្តិការណ៍ សំខាន់ៗ ដែលត្រូវចងចាំចំពោះអ្នកប្រើប្រាស់ផ្លូវ គោលបំណង នៃការចុះផ្សព្វផ្សាយពីច្បាប់ចរាចរណ៍
កាលពីព្រឹកថ្ងៃទី២៦ ខែកញ្ញា ឆ្នាំ២០២៤ នៅមុខមន្ទីរនាផ្លូវជាតិលេខ៥ ។
មន្រ្តីជំនាញ បានធ្វើការណែនាំ ដល់បងប្អូនប្រជាពលរដ្ឋដែលកំពុងធ្វើដំណើរលើដងផ្លូវ ឲ្យមានការយល់ដឹងបន្ថែមទៀត ដូចជាជិះម៉ូតូត្រូវពាក់មួកសុវត្ថិភាពបើកបររថយន្តត្រូវពាក់ខ្សែក្រវាត់ពិសេសការបើកបរទៀតត្រូវមានចិត្តអត់ធន់អធ្យាស្រ័យគ្នាទៅវិញទៅមក ។
លោកសុក ចាន់ថា បញ្ជាក់ថា បើតាមការសង្កេត បានឲ្យដឹងថា អ្នកបើកបរម៉ូតូងាយរងគ្រោះថ្នាក់ ជាងអ្នកបើកបររថយន្ត ហេតុនេះហើយការប៉ះទង្គិចម្ដងម្ដងឱកាសនៃអ្នករបួសនិងអ្នកស្លាប់ និងអ្នកបើកបរម៉ូតូមានច្រើនជាអ្នកបើកបររថយន្ត ។ ការចេះយោគយល់ពីច្បាប់ចរាចរណ៍គឺជាកត្តាចម្បង ក៏ប៉ុន្តែកត្តាដែលសំខាន់នោះ គឺពេលបើកបរលោកអ្នកត្រូវមានការប្រុងប្រយ័ត្នខ្ពស់ជានិច្ច កុំបើកបរហួសល្បឿនកំណត់កុំបើកបរពេលកំពុងស្រវឹង មានសុជីវធម៌អធ្យាស្រ័យ ចំពោះអ្នកបើកបរ ឬប្រើប្រាស់ផ្លូវដូចគ្នា សូមចាំថាការប្រមាថក្នុងការបើកបរគឺជាការប្រមាថដល់អាយុជីវិតរបស់ខ្លួនឯង ក៏ដូចជា អ្នកដទៃ។
ក្នុងការចុះផ្សព្វផ្សាយនេះផងដែរ មន្ត្រីរបស់លោក ក៏បានធ្វើការចែកជូននូវខិត្តប័ណ្ណសៀវភៅ ស្តីពី ច្បាប់ចរាចរណ៍ បិទចំណាំងប្លាត សួរសំណួរចម្លើយដល់អ្នកបើកបរម៉ូតូ ដែលពុំបានពាក់មួកសុវត្ថិភាព និងបានធ្វើការចែកជូនមួកសុវត្ថិភាពផងដែរ។
សូមបញ្ជាក់ផងដែរថា រយៈពេលមួយព្រឹកនេះ ជាលទ្ធផល អ្នកបើកបរម៉ូតូមិនពាក់មួកសុវត្ថិភាពមានប្រមាណជាង ៣៥% ប៉ុណ្ណោះ ៕
