វាយចៅបង្កើត ហើយយកកាំបិតតាំងតោ ដេញគំរាមសំលាប់ ត្រូវសមត្ថកិច្ចឃាត់ខ្លួន

បាត់ដំបង ៖ ជនសង្ស័យ០១នាក់ ត្រូវបានកម្លាំងនៃអធិការដ្ឋាននគរបាលស្រុករុក្ខគីរី ឃាត់ខ្លួនក្រោយប្រើហិង្សាដោយវាយនិងយកកាំបិតតាំងតោដេញគំរាមសំលាប់ចៅបង្កើតខ្លួនឯង។

កិច្ចប្រតិបត្តិការនេះធ្វើឡើងកាលពីវេលាម៉ោង ១៨និង០០នាទី ថ្ងៃទី១៤ ខែកញ្ញា ឆ្នាំ២០២៤ នៅចំណុចក្រុមទី៨ ភូមិបឹងត្របែក ឃុំស្តុកប្រវឹក ស្រុករុក្ខគិរី ខេត្តបាត់ដំបង ដោយបានឃាត់ខ្លួនជនសង្ស័យ០១នាក់ឈ្មោះ ស៊ុំ ស៊ុន ភេទប្រុស អាយុ៦២ឆ្នាំ ដែលជនសង្ស័យបានប្រើដៃវាយទៅលើជនរងគ្រោះ ឈ្មោះ តយ មករា ហៅតូ ភេទប្រុស អាយុ១៤ឆ្នាំត្រូវជាចៅបង្កើតបណ្តាលអោយត្រូវថ្គាមខាងឆ្វេង០១ដៃហើមនិងបានយកកាំបិតតាំងតោដេញគំរាមសំលាប់បន្ថែមទៀតផងដែរ ព្រោះតែស្រវឹងស្រា និងខឹងជនរងគ្រោះមិនយកមាន់ទុក។

ក្រោយពីឃាត់ខ្លួន ជនសង្ស័យរួមជាមួយវត្ថុតាងកាំបិតតាំងតោដងដែក០១ដើម ត្រូវបានកម្លាំងជំនាញអធិការនគរបាលស្រុកបានរៀបចំសំណុំរឿងបញ្ជូនបន្តទៅកាន់ការិយាល័យជំនាញស្នងការខេត្តដើម្បីចាត់ការតាមនីតិវិធី ៕

ដោយ ៖ សាលី