សមាគមសារព័ត៌មានសុក្រឹតខេត្តបាត់ដំបង នាំយកអំណោយមនុស្សធម៌ ផ្តល់ជូនលោកយាយ តុង ជ្រឹម កំពុងមានជំងឺប្រចាំកាយ

បាត់ដំបង ៖ នៅព្រឹក១៣ ខែសីហា ឆ្នាំ២០២៤នេះ លោក សុីម វិសាល ប្រធានសមាគមសារព័ត៌មានសុក្រឹតសាខាខេត្តបាត់ដំបង តំណាងអោយលោក នួន នី ប្រធានសមាគមសារព័ត៌មានសុក្រឹត និងសហការី បានចុះនាំយកអំណោយមូលនិធិមនុស្សធម៌របស់សមាគមសារព័ត៌មានសុក្រឹត និងសប្បុរសជន ផ្តល់ជូនគ្រួសារលោកយាយ តុង ជ្រឹម អាយុ ៧៨ឆ្នាំ ចាស់ជរា មានជំងឺប្រចាំកាយសម្រាកព្យាបាលនៅផ្ទះ ដែលត្រូវជាយាយបង្កើតរបស់លោក ជឹម ភក្តី ទីប្រឹក្សាសមាគមសាខាខេត្ត រស់នៅក្នុងភូមិកាប់គោថ្មី សង្កាត់អូរចារ ក្រុងបាត់ដំបង ។

លោក ស៊ីម វិសាល ប្រធានសមាគមសារព័ត៌មានសុក្រឹត សាខាខេត្តបាត់ដំបង បានបញ្ជាក់ថា អំណោយជាគ្រឿងឧបភោគបរិភោគ និងតេយ្យទាន ដែលនាំយកមកជូនលោកយាយ តុង ជ្រឹម នាពេលនេះរួមមាន!  អង្ករ៥០កីឡូក្រាម ,មី០១កេះ ,ទឹកសុទ្ធ០៥យួរ ,ទឹកត្រី០២យួរ ,ប៊ីចេង០៣កញ្ចប់ ,ថវិកាចំនួន ២០ដុល្លា និង៥០០០០រៀល។

ជាកិច្ចឆ្លើយតប បន្ទាប់ពីទទួលបានការឧបត្ថម្ភរួចមក លោក ជឹម ចិន្តា អតីតមន្ត្រីកងរាជអាវុធហត្ថខេត្តបាត់ដំបង បានសម្តែងនូវក្តីរំភើប និងថ្លែងអំណរគុណយ៉ាងជ្រាលជ្រៅចំពោះក្រុមការងារសមាគមសារព័ត៌មានសុក្រឹត ដែលមានលោក នួន នី ជាប្រធាន និងលោក ស៊ីម វិសាល ប្រធានសាខាខេត្ត ដែលបានសហការយកចិត្តទុកដាក់នាំយកថវិកា និងរបស់របរហូបចុកមកផ្តល់ជូនដល់គ្រួសារគាត់ ក្នុងនាមសប្បុរសជនដែលតែងតែជួយដល់ជនក្រីក្រ និងជនចាស់ជរា គ្រប់ពេលវេលា សូមអោយក្រុមការងារទាំងអស់ជួបតែសេចក្តីសុខ សេចក្តីចំរើន ដើម្បីចូលរួមបំរើសង្គមជាតិទៅថ្ងៃមុខបន្តទៀត ៕

ដោយ ៖ សាលី