ឯកឧត្តម អ៊ី ឈាន ប្រកាសចូលកាន់តំណែង ក្រុមប្រឹក្សាខេត្តប៉ៃលិន អាណត្តិទី៤ ចំនួន១៥រូប
ប៉ៃលិន ៖ ក្រុមប្រឹក្សាខេត្តប៉ៃលិន អាណត្តិទី៤ ចំនួន ១៥រូប ត្រូវបានប្រកាសចូលកាន់តំណែងកាលពីថ្ងៃទី១០ ខែមិថុនា ឆ្នាំ២០២៤ ក្រោមអធិបតីភាពឯកឧត្តមទេសរដ្ឋមន្ត្រី អ៊ី ឈាន ប្រធានក្រុមការងាររាជរដ្ឋាភិបាលចុះមូលដ្ឋានខេត្តប៉ៃលិន ។
![](https://www.khmerpit.news/wp-content/uploads/2024/06/IMG_20240610_210248_460-650x418.jpg)
ពិធីក៏មានការអញ្ជើញចូលរួមពីសំណាក់ឯកឧត្តម ជា ចាន់ឌិន ប្រធានក្រុមប្រឹក្សាខេត្តប៉ៃលិន, លោកជំទាវបណ្ឌិត បាន ស្រីមុំ អភិបាលខេត្តប៉ៃលិន និងសមាជិកសមាជិកាអាណត្តិថ្មី អភិបាលរងខេត្ត ថ្នាក់ដឹកនាំមន្ទីរអង្គភាពជុំវិញខេត្ត អភិបាលក្រុង/ស្រុក និងអ្នកពាក់ព័ន្ធ ។
![](https://www.khmerpit.news/wp-content/uploads/2024/06/IMG_20240610_210248_295-650x433.jpg)
លោកជំទាវបណ្ឌិត បាន ស្រីមុំ បានធ្វើរបាយការណ៍សង្ខេបពាក់ព័ន្ធភូមិសាស្ត្រ និងការអភិវឌ្ឍន៍រីកចម្រើនរបស់ខេត្ត ពិសេសការចូលរួមចំណែក របស់ក្រុមប្រឹក្សាខេត្ត ជាមួយគណៈអភិបាលខេត្ត ដែលបានធ្វើឲ្យរដ្ឋបាលខេត្ត សម្រេចបាននូវការដោះស្រាយបញ្ហានានា ជំរុញការអភិវឌ្ឍន៍រីកចម្រើនជាបន្តបន្ទាប់រហូតមកដល់ពេលនេះ ជាពិសេសបានសម្តែងនូវការចូលរួមអបអរសាទរយ៉ាងក្រៃលែង ចំពោះក្រុមប្រឹក្សាខេត្ត អាណត្តិថ្មីនេះផងដែរ។
![](https://www.khmerpit.news/wp-content/uploads/2024/06/IMG_20240610_210330_045-650x433.jpg)
បន្ទាប់ពីប្រគល់ព្រះរាជក្រឹត្យទទួលស្គាល់ជូនដល់ក្រុមប្រឹក្សាខេត្ត អាណត្តិថ្មី និងការឡើងធ្វើការប្តេជាចិត្ត របស់ឯកឧត្តម ជា ចាន់ឌិន ប្រធានក្រុមប្រឹក្សាខេត្ត តំណាងឲ្យសមាជិកសមាជិកាទាំងអស់រួចមក ឯកឧត្តមទេសរដ្ឋមន្ត្រី អ៊ី ឈាន ប្រធានក្រុមការងាររាជរដ្ឋាភិបាលចុះមូលដ្ឋានខេត្តប៉ៃលិន បានមានប្រសាសន៍លើកឡើងថា៖ ក្រុមប្រឹក្សា គឺជាតំណាងប្រជាពលរដ្ឋក្នុងខេត្តទាំងមូល ដែលមានអំណាចធ្វើសេចក្តីសម្រេចខាងបញ្ញត្តិផង និងអំណាចប្រតិបត្តិផង ក្នុងក្របខណ្ឌ ដែលកំណត់ដោយច្បាប់ និងលិខិតបទដ្ឋានគតិយុត្តជាធរមាន ក្នុងការគ្រប់គ្រង ចាត់ចែងកិច្ចការមូលដ្ឋាន ដើម្បីឆ្លើយតបទៅនឹងតម្រូវការប្រជាពលរដ្ឋក្នុងដែនសមត្ថកិច្ចរបស់ខ្លួន ដូច្នេះត្រូវខិតខំបម្រើផលប្រយោជន៍ និងសេចក្តីត្រូវការរបស់ប្រជាពលរដ្ឋ ដោយស្មើភាព និងតម្លាភាព ជាពិសេសគឺមិនត្រូវប្រកាន់និន្នាការនយោបាយណាមួយឡើយ។
នៅក្នុងឱកាសនោះផងដែរ ឯកឧត្តមទេសរដ្ឋមន្ត្រី អ៊ី ឈាន ក៏បានចូលរួមអបអរសាទរចំពោះ ប្រធាន និងសមាជិក សមាជិកា ក្រុមប្រឹក្សាខេត្តអាណត្តិថ្មី ត្រូវបានតំណាងប្រជាពលរដ្ឋ ពោលគឺសមាជិកក្រុមប្រឹក្សាឃុំ សង្កាត់ ផ្តល់សេចក្តីទុកចិត្តបោះឆ្នោតជ្រើសរើសជាប្រធាន និងសមាជិកសមាជិកាក្រុមប្រឹក្សាខេត្ត សម្រាប់អាណត្តិទី៤នេះ ដើម្បីបន្តចូលរួមដឹកនាំខេត្តប៉ៃលិន ជាមួយគណៈអភិបាលខេត្ត បន្តអភិវឌ្ឍន៍រីកចម្រើន កាន់តែប្រសើរឡើងបន្ថែមទៀត៕
![](https://www.khmerpit.news/wp-content/uploads/2024/06/IMG_20240610_210327_926-650x517.jpg)
![](https://www.khmerpit.news/wp-content/uploads/2024/06/IMG_20240610_210328_416-650x561.jpg)
![](https://www.khmerpit.news/wp-content/uploads/2024/06/IMG_20240610_210248_994-650x433.jpg)
![](https://www.khmerpit.news/wp-content/uploads/2024/06/IMG_20240610_210322_995-650x456.jpg)
![](https://www.khmerpit.news/wp-content/uploads/2024/06/IMG_20240610_210322_730-650x433.jpg)
![](https://www.khmerpit.news/wp-content/uploads/2024/06/IMG_20240610_210256_298-650x433.jpg)
![](https://www.khmerpit.news/wp-content/uploads/2024/06/IMG_20240610_210249_154-650x433.jpg)