ជិះម៉ូតូបត់ឆ្លងផ្លូវមិនប្រយ័ត្ន ត្រូវរថយន្តបុកពីក្រោយ បណ្តាលអោយស្លាប់ភ្លាមៗនឹងកន្លែង

បាត់ដំបង ៖ ស្ត្រីម្នាក់បានស្លាប់ភ្លាមៗ ក្រោយជិះម៉ូតូបត់ឆ្លងផ្លូវមិនប្រយ័ត្ន ត្រូវរថយន្តបុកពីក្រោយពេញទំហឹងនៅវេលាម៉ោង ១៩និង១៨នាទី ថ្ងៃទី៣០ ខែឧសភា ឆ្នាំ២០២៤ នៅតាមបណ្តោយផ្លូវជាតិលេខ៥ ត្រង់ចំណុចក្រុមទី១ ស្ថិតក្នុងភូមិដុបក្រសាំង ឃុំព្រៃតូច ស្រុកមោងឬស្សី ខេត្តបាត់ដំបង ។

ប្រភពពីប្រជាពលរដ្ឋនៅកន្លែងកើតហេតុ បានអោយដឹងថា ដំបូងគេឃើញម៉ូតូម៉ាកហុងដាឌ្រីម ពណ៌ខ្មៅមួយគ្រឿង ពាក់ផ្លាកលេខ តាកែវ 1E-7093 បើកបរដោយស្ត្រីម្នាក់ ក្នុងទិសដៅពីត្បូងទៅជើង(ភ្នំពេញ.បាត់ដំបង) លុះមកដល់ចំណុចកើតហេតុខាងលើ បានបត់ឆ្វេងឆ្លងផ្លូវ ភ្លាមនោះក៏មានរថយន្តម៉ាក លុចស៊ីស NX200T ពណ៌ស មួយគ្រឿង ពាក់ផ្លាកលេខ កម្ពុជា ALIGO.05 បើកបរដោយបុរសម្នាក់ ក្នុងទិសដៅស្របគ្នាបានជ្រុកមកបុកពីក្រោយពេញទំហឹងបណ្តាលអោយស្លាប់ភ្លាមៗតែម្តង។

ក្រោយពេលកើតហេតុសមត្ថកិច្ចនគរបាលជំនាញបានចុះមកវាស់វែងធ្វើកំណត់ហេតុយកមធ្យោបាយទាំងពីរទៅរក្សាទុកនៅការិយាល័យនគរបាលចរាចរណ៍ផ្លូវគោកខេត្តបាត់ដំបង ដើម្បីចាត់ការតាមនីតិវិធី  ចំណែកសពត្រូវបានប្រគល់អោយសាច់ញាតិយកទៅរៀបចំធ្វើបុណ្យតាមប្រពៃណី៕
ដោយ ៖ សាលី