រន្ទះបាញ់ស្លាប់ក្មេងស្រីម្នាក់ និងផ្ទះ០៣ខ្នងរងការខូចខាត ដោយខ្យល់កន្ត្រាក់

បាត់ដំបង ៖ ក្មេងស្រីម្នាក់ត្រូវបានរន្ទះបាញ់ស្លាប់ និងផ្ទះពលរដ្ឋចំនួន០៣ខ្នង រងការខូចខាតដោយគ្រោះធម្មជាតិ នៅក្នុងភូមិសាស្ត្រស្រុកមោងឬស្សី នៃខេត្តបាត់ដំបង។

ករណីគ្រោះធម្មជាតិ ភ្លៀងលាយឡំជាមួយខ្យល់កន្ត្រាក់និងផ្គរន្ទះខាងលើនេះ បានកើតឡើងនៅវេលាម៉ោង ១៥និង៥០នាទី ថ្ងៃទី១៨ ខែឧសភា ឆ្នាំ២០២៤ នៅត្រង់ចំណុចភូមិព្រះធាតុ ឃុំរបស់មង្គល ស្រុកមោងឫស្សី ខេត្តបាត់ដំបង បណ្តាលអោយរន្ទះបាញ់ក្មេងស្រី០១នាក់ស្លាប់មានឈ្មោះ សុគន្ធ នីសា អាយុ១៣ឆ្នាំ ខណៈដែលក្មេងស្រីរងគ្រោះកំពុងជ្រកភ្លៀងនៅក្រោមផ្ទះរបស់ខ្លួន ។

ហេតុការណ៍ខាងលើ ក៏បានធ្វើអោយខូចខាតផ្ទះប្រជាពលរដ្ឋចំនួន០៣ខ្នង ដែលមានម្ចាស់ផ្ទះឈ្មោះ គុណ សីហា ភេទប្រុស អាយុ៣៨ឆ្នាំ, ឈ្មោះ តាត ផល ភេទប្រុស អាយុ៦៥, និងឈ្មោះ ពៅ ដេះ ភេទស្រី អាយុ៧៥ឆ្នាំ រស់នៅភូមិឃុំកើតហេតុខាងលើ ៕

ដោយ ៖ សាលី