សង្ស័យស្រវឹងស្រា បើករថយន្តធ្លាក់ប្រឡាយ ពេលអ្នកសារព័ត៌មានទៅដល់ បែរជាជេរប្រមាថកប់ៗមាត់

បាត់ដំបង ៖ រថយន្ត highlander មួយគ្រឿង សង្ស័យតៃកុងបើកបរក្នុងស្ថានភាពស្រវឹង បានរ៉េចង្កូតធ្លាក់ចូលប្រឡាយដោយខ្លួនឯង តែពេលអ្នកសារព័ត៌មានទៅដល់ បែរជាជេរប្រមាថកប់ៗមាត់ ។

ហេតុការណ៍គ្រោះថ្នាក់ចរាចរណ៍ បង្កការភ្ញាក់ផ្អើលខាងលើនេះ បានកើតឡើងនៅវេលាម៉ោងជាង ៩យប់ នាថ្ងៃទី១៧ ខែឧសភា ឆ្នាំ២០២៤ នៅចំណុចផ្លូវបំបែកមួយកន្លែង ស្ថិតក្នុងភូមិបាឡាត់ ឃុំនរា ស្រុកសង្កែ ខេត្តបាត់ដំបង។

ប្រភពនៅកន្លែងកើតហេតុ បានប្រាប់ថា នៅមុនពេលកើតហេតុ គឺ រថយន្តម៉ាក highlander ពណ៌ទឹកប្រាក់មួយគ្រឿង ពាក់ផ្លាកលេខបាត់ដំបង 2B-1311 បើកបរដោយបុរសម្នាក់ ក្នុងទិសដៅពីកើតទៅលិច លុះមកដល់ចំណុចកើតហេតុខាងលើ បានបើកគេចនិងម៉ូតូ០១គ្រឿង ក៏បានរ៉េចង្កូតធ្លាក់ផ្លូវបណ្តាលអោយចូលប្រឡាយ ហើយនៅពេលក្រុមអ្នកសារព័ត៌មានបានចុះទៅដល់ មិនទាន់ដឹងអ្វីផង ក៏ស្រាប់តែអ្នកបើកបរបានចុះមកទាំងមានអាការៈជ្រងេងជ្រង៉ាង ដូចមនុស្សស្រវឹង និងបានជេរប្រមាថអ្នកសារព័ត៌មានកប់ៗមាត់តែម្តង។

ក្រោយពេលកើតហេតុ ម្ចាស់រថយន្តខាងលើ បានទំនាក់ទំនងបងប្អូន យករថយន្តមកជួយអូសឡើងចេញពីប្រឡាយ ដើម្បីយកទៅធ្វើការជួសជុលដោយខ្លួនឯងផងដែរ ៕