សមត្ថកិច្ច បង្ក្រាបទំនិញខូចគុណភាព យកមកធ្វើការដុតបំផ្លាញចោល
ព្រះវិហារ៖ ទំនិញខូចគុណភាពជាច្រើនមុខ ត្រូវបានកម្លាំងនគរបាលសេដ្ឋកិច្ចនៃស្នងការដ្ឋាននគរបាលខេត្តព្រះវិហារ មានការសម្របសម្រួលនីតិវិធីពីលោក ស្រេង វុទ្ធា ព្រះរាជអាជ្ញារងអមសាលាដំបូងខេត្តព្រះវិហារ ធ្វើការបង្រ្កាបយកមកធ្វើការដុតបំផ្លាញចោល នៅថ្ងៃទី៤ ខែមេសា ឆ្នាំ២០២៤នេះ នៅចំណុចច្រករបៀងអានសេះ។
យោងតាមរបាយការណ៍របស់លោកវរសេនីយ៍ឯក ឈួរ ម៉ាឌី ស្នងការរងទទួលផែនប្រឆាំងបទល្មើសសេដ្ឋកិច្ច បានឱ្យដឹងថា ទំនិញខូចគុណភាពចំនួន ៣ ៩៤៦ ដប ដែលក្រុមឈ្មួញនាំចូលតាមច្រករបៀងដោយខុសច្បាប់ ត្រូវបានសមត្ថកិច្ចយើងធ្វើការត្រួតពិនិត្យឃើញថា ហួសសុពលភាព ខូចគុណភាព នាំឱ្យប្រជាពលរដ្ឋអ្នកប្រើប្រាសប៉ះពាល់ដល់សុខភាព កម្លាំងយើងចាប់យកមកដុតកំទេចចោលតែម្ដង។
លោកវរសេនីយ៍ឯក បានឱ្យដឹងទៀតថា តាមការណែនាំចង្អុរបង្ហាញរបស់ឯកឧត្តមឧត្តមសេនីយ៍ទោ សួស សុខដារ៉ា ស្នងការនគរបាលខេត្តព្រះវិហារ ឱ្យកម្លាំងជំនាញយកចិត្តទុកដាក់តាមដានស៊ើបអង្កេតរាល់បទល្មើសសេដ្ឋកិច្ចទាំងអស់ដែលបានធ្វើចរាចរណ៍នៅក្នុងដែនដីសមត្ថកិច្ចរបស់ខ្លួន ឱ្យមានប្រសិទ្ធភាពខ្ពស់បំផុត ដើម្បីការពារសុខុមាលភាពបងប្អូនប្រជាពលរដ្ឋយើង ។
