បើកបរខ្វះការប្រុងប្រយ័ត្ន ជ្រុលទៅបុកត្រាក់ទ័រ បណ្តាលអោយស្លាប់ភ្លាមៗនឹងកន្លែង

បាត់ដំបង ៖ បុរសម្នាក់បានស្លាប់ភ្លាមៗ ក្រោយជិះម៉ូតូទៅបុកពែលត្រាក់ទ័របកាលពីនៅវេលាម៉ោង ១៩និង១០នាទី ថ្ងៃទី០៧ ខែមីនា ឆ្នាំ២០២៤ នៅចំណុចភូមិសំរោង ឃុំធិបតី ស្រុកគាស់ក្រឡ ខេត្តបាត់ដំបង។

ប្រភពនៅកន្លែងកើតហេតុ បានប្រាប់ថា នៅមុនពេលកើតហេតុគេឃើញត្រាក់ទ័រសណ្តោងរ៉ឺម៉កដឹកម៉ាស៊ីនច្រូតស្រូវមួយគ្រឿង បើកបរដោយឈ្មោះ ឆន វ៉ាន់ថាន ភេទប្រុស អាយុ៣៣ឆ្នាំ រស់នៅភូមិព្រៃទទឹង ឃុំបាយដំរាំ ស្រុកបាណន់ ខេត្តបាត់ដំបង ក្នុងទិសដៅពីកើតទៅលិច លុះមកដល់ចំណុចកើតហេតុខាងលើបានបត់ឆ្វេងចូលផ្ទះ ភ្លាមនោះក៏ស្រាប់តែមាន ម៉ូតូម៉ាកហុងដាឌ្រីម ពណ៌ខ្មៅ ស៊េរីឆ្នាំ ២០២១ មួយគ្រឿង ពាក់ផ្លាកលេខ បាត់ដំបង 1AQ-7982 បើកបរដោយឈ្មោះ ឈើយ ល្បឿន ភេទប្រុស អាយុ ៣៧ឆ្នាំ រស់នៅភូមិតាថុក ឃុំធិបតី ស្រុក គាស់ក្រឡ ខេត្តបាត់ដំបង ទិសដៅពីលិចទៅកើតក្មុងល្បឿនយ៉ាងលឿន បានជ្រុលចង្កូតទៅបុកពេញទំហឹងបណ្តាលអោយស្លាប់នៅកន្លែងកើតហេតុតែម្តង។

ក្រោយពេលកើតហេតុសមត្ថកិច្ចជំនាញបានចុះទៅវាស់វែងធ្វើកំណត់ហេតុប្រគល់សពអោយខាងក្រុមគ្រួសារសាច់ញាតិយករៀបចំធ្វើបុណ្យតាមប្រពៃណី ចំណែកមធ្យោបាយទាំងពីរយកមករក្សាទុកនៅការិយាល័យនគរបាលចរាចរណ៍ផ្លូវគោកដើម្បីចាត់ការតាមផ្លូវច្បាប់ ៕
ដោយ ៖ សាលី