ព្រះបរមអដ្ឋិធាតុ ព្រះបរមរតនកោដ្ឋ ត្រូវបានដង្ហែមកតម្កល់ព្រះបរមចេតិយ៍ នៅខេត្តប៉ៃលិន

ប៉ៃលិន៖ ថ្ងៃទី១០-១១ ខែឧសភា ឆ្នាំ២០២២ លោក ឃ្លោក នួយ អភិបាលរងខេត្ត តំណាងដ៏ខ្ពង់ខ្ពស់លោកជំទាវ បាន ស្រីមុំ អភិបាលខេត្តប៉ៃលិន បានអញ្ជើញចូលរួម ដង្ហែព្រះបរមអដ្ឋិធាតុ ព្រះករុណា ព្រះបាទសម្តេច នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ (ព្រះបរមរតនកោដ្ឋ) និងពិធីរាប់បាត្រព្រះសង្ឃចំនួន ៩០អង្គ ស្ថិតក្រោមព្រះរាជធិបតីដ៏ខ្ពង់ខ្ពស់ សម្តេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិតសង្ឃ បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយ និងជាព្រះប្រធានគណៈសង្ឃនាយក នៃគណៈធម្មយុត្តិកនិកាយ នៃព្រះរាជាណាចក្រកម្ពុជា មកតម្កល់នៅព្រះបរមចេតិយ៍ វត្តព្រះពុទ្ធត្រៃរតន៍មង្គល (ហៅវត្តអូរប្រើស) ដែលស្ថិតនៅភូមិអូរប្រើស សង្កាត់អូរតាវ៉ៅ ក្រុងប៉ៃលិន ខេត្តប៉ៃលិននា ។

លោក ឃ្លោក នួយ អភិបាលរងខេត្តប៉ៃលិន បានមានប្រសាសន៍ថា៖ ក្នុងនាមថ្នាក់ដឹកនាំ មន្ត្រីរាជការ និង ប្រជាពល រដ្ឋខេត្តប៉ៃលិន ពិតជាមានមោទនភាពយ៉ាងក្រៃលែង ដែលសម្ដេចព្រះមហាសង្ឃរាជ បួរ គ្រី បានដង្ហែព្រះបរមអដ្ឋិធាតុ ព្រះករុណា ព្រះបាទសម្តេច នរោត្តម សីហនុ(ព្រះបរមរតនកោដ្ឋ) មកតម្កល់នៅខេត្តប៉ៃលិន ដែលនេះបង្ហាញអោយឃើញថា ខេត្តប៉ៃលិន ជាខេត្តមួយដែលព្រះមហាក្សត្រ ព្រះករុណាព្រះបាទព្រះបរមនាថ នរោត្តម សីហមុនី ទ្រង់សពព្រះហឬទ័យក្នុងការតម្កល់ព្រះបរមអដ្ឋិធាតុ ព្រះបរមរតកោដិ នៅលើទឹកដីខេត្តប៉ៃលិន សម្រាប់ប្រជានុរាស្ត្ររបស់ព្រះអង្គ គោរពបូជាបាន គ្រប់ពេលវេលា

លោកអភិបាលរងខេត្ត បានមានប្រសាសន៍លើកឡើងថា៖ ព្រះស្នាដៃរបស់ព្រះករុណាព្រះបាទសម្តេចព្រះនរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ «ព្រះ បរមរតនកោដ្ឋ» គឺជាឥស្សរជន លេចធ្លោ បំផុតលើឆាកជាតិ និងអន្តរជាតិ ក្នុងការទាមទារឯករាជ្យជាតិ និងមានស្នាព្រះហស្ថរាប់មិនអស់សម្រាប់ជាតិ ដូច្នេះប្រជានុរាស្ត្រគ្រប់រូប តែងតែចងចាំមិនអាចភ្លេចនូវគុណនូបការៈដ៏ជ្រាលជ្រៅ វិសេសថ្លៃថ្លា នៃស្នាព្រះហស្ថរបស់ព្រះអង្គដោយការគោរព និងក្តីអាលោះអាល័យជានិច្ចផងដែរ។
នៅក្នុងឱកាសនោះ សម្ដេចព្រះមហាសង្ឃរាជ បួរ គ្រី បានមានព្រះសង្ឃដីកាអោយដឹងថា៖ ខេត្តប៉ៃលិនជាខេត្តទី២ ហើយដែលត្រូវ បានដង្ហែព្រះបរមអដ្ឋិធាតុ ព្រះករុណា ព្រះបាទសម្តេច នរោត្តម សីហនុ (ព្រះបរមរតនកោដ្ឋ) មកតម្កល់ព្រះបរមចេតិយ៍វត្តអូរប្រើសខេត្តប៉ៃលិននេះ ហើយបុណ្យនេះកើតឡើងដោយសទ្ធាជ្រះថ្លាពីញាតិញោមពុទ្ធបរិស័ទ្ធ ជិតឆ្ងាយគ្រប់ៗគ្នាទាំងអស់ ដោយការគោរពស្រឡាញ់ចំពោះ ព្រះបរមរតនកោដ្ឋ ដែលជាមហាវីរក្សត្រ ដែលមានស្នាព្រះហស្ថ ជាច្រើនសម្រាប់ជាតិ មាតុភូមិ ។

សម្ដេចព្រះមហាសង្ឃរាជ បានមានព្រះសង្ឃដីកាបន្តថា៖ ម្យ៉ាងវិញទៀតការតម្កល់ព្រះបរមអដ្ឋិធាតុ (ព្រះបរមរតនកោដ្ឋ) នៅលើទឹកដីខេត្តប៉ៃលិន ដោយសារទឹកដីមួយនេះ ជាទឹកដីមានព្រៃភ្នំជ្រលងដងអូរព័ទ្ធជុំវិញ ត្រជាក់ត្រជុំ និងតម្កល់ជាបូនីយកិច្ចសម្រាប់បងប្អូនប្រជាពលរដ្ឋក្នុងខេត្ត ងាយស្រួលក្នុងគោរពបូជាផងដែរ។