អាជ្ញាធរខេត្តបន្ទាយមានជ័យ និងមន្រ្តីជំនាញចុះពិនិត្យទីតាំងស្តុក និងចែកចាយសត្វមាន់នាំចូលពីថៃ
បន្ទាយមានជ័យ ៖ ទីតាំងស្តុក និងចែកចាយសត្វមាន់នាំចូលពីប្រទេថៃមួយកន្លែង ស្ថិតនៅភូមិថ្មី ឃុំអូរស្រឡៅ ស្រុកម៉ាឡៃ ខេត្តបន្ទាយមានជ័យ ត្រូវបានអាជ្ញាធរខេត្ត រួមជាមួយការិយាល័យផលិតកម្ម និងបសុព្យាបាលកាលពីថ្ងៃទី២៦ ខែកញ្ញា ឆ្នាំ២០២៣ ចុះត្រួកពិនិត្យ ។
ការចុះត្រួកពិនិត្យនេះដឹកនាំដោយលោក ឃ្លោក នួយ អភិបាលរងខេត្តបន្ទាយមានជ័យ អមដំណេីរលោក ឈុន ប៊ុនថា នាយកទីចាត់អន្តរវិស័យ លោក ហ៊ុយ ទូច ប្រធានការិយាល័យផលិតកម្ម និងបសុព្យាបាល នៃមន្ទីកសិកម្ម រុក្ខាប្រមាញ់ និងនេសាទខេត្ត ។
តាមការលើកឡើងរបស់អាជ្ញាធរខេត្ត ការចុះទីតាំងខាងលេី គឺ ដេីម្បីពិនិត្យច្បាប់អនុញ្ញាត នៃការនាំចូលសត្វមាន់រស់ពីប្រទេសថៃ ចូលមកកម្ពុជា ដេីម្បីចែកចាយក្នុងទីផ្សានៅក្នុងប្រទេសកម្ពុជា ។
លោក ឃ្លោក នួយ អភិបាលរងខេត្ត បានអោយដឹងថាយោងអនុសាសន៍ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ លោកបានធ្វេីការណែនាំដល់ម្ចាស់ទីតាំងដែលស្តុកសត្វមាន់ដេីម្បីចែកចាយបន្តទៅតាមបណ្តារទីតាំងផ្សេងៗត្រូវសម្អាតអនាម័យទីតាំងឱ្យបានល្អ កុំឱ្យមានជះក្លិនស្អុយ និងធ្វេីការសម្អាតបរិស្ថានជុំវិញឱ្យបានល្អ ។
បេីតាមការបញ្ជាក់ពីមន្ត្រីបសុពេទ្យ ដែលប្រចាំការនៅទីនោះបានប្រាប់ឱ្យដឹងថា ទីតាំងស្តុកចែកចាយមាន់ខាងលេី មុនការនាំចូលសត្វមាន់មកកាន់ទីផ្សាកម្ពុជា ឆ្លងកាត់កាត់ការពិនិត្យសុខភាពសត្វយ៉ាងម៉តចត់ពីប្រទេសថៃមុនអនុញ្ញាតឱ្យនាំចូល ។
មន្ត្រីដដែលបញ្ជាក់ថា ទីតាំងខាងលេីមានក្រុមហ៊ុនចំនួន៣ ដែលមានច្បាប់អនុញ្ញាតត្រឹមត្រូវ(ច្បាប់ចេញពីអគ្គនាយកដ្ឋាន) ដេីម្បីនាំចូលសត្វមាន់ចែកចាយបន្តតាមបណ្តាខេត្តផ្សេងៗ ។ ដោយក្រុមហ៊ុនទាំង៣មាន ១-ក្រុមហ៊ុន កូ ឡែន (២ច្បាប់), ២-ក្រុមហ៊ុនគន្ធារស្មីពេជ្យ(២ច្បាប់), ៣-ក្រុមហ៊ុនហ្វាញ គ្រុប (២ច្បាប់) ដោយក្នុងមួយច្បាប់អនុញ្ញាតដឹកបានត្រឹមតែសត្វមាន់២០០០ក្បាលប៉ុណ្ណោះ ។ ក្នុងមួយថ្ងៃក្រុមហ៊ុននីមួយៗ ចេញចំនួន២ច្បាប់ ដឹកសត្វមាន់ចន្លោះពី៣០០០ ទៅ៤០០០ក្បាល ៕
