ឯកឧត្តម អ៊ុំ រាត្រី បើកសិក្ខាសាលា ស្ដីពី បញ្ហាប្រឈម ក្នុងការទទួលការគាំទ្រ ផ្នែកហិរញ្ញវត្ថុ សម្រាប់សហគ្រាសធុនតូច និងមធ្យម វិស័យកមន្តសាល ក្នុងខេត្តបន្ទាយមានជ័យ
បន្ទាយមានជ័យ ៖ ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ អញ្ជើញជាអធិបតីភាពបើកសិក្ខាសាលា ស្ដីពី បញ្ហាប្រឈម ក្នុងការទទួលការគាំទ្រផ្នែកហិរញ្ញវត្ថុ សម្រាប់សហគ្រាសធុនតូច និងមធ្យម វិស័យកមន្តសាល ក្នុងខេត្តបន្ទាយមានជ័យ សិក្ខាសាលាជាតិជាស៊េរី ស្តីពីការអភិវឌ្ឍន៍ វិស័យឯកជន ក្នុងភាគពាយ័ព្យនៃប្រទេសកម្ពុជា នៃកម្មវិធីពង្រឹងភាពប្រកួតប្រជែង នៃសហគ្រាសជាតិ (ICONE) ។
សិក្ខាសាលានេះ ប្រព្រឹត្តទៅដោយមានការចូលរួមលោកបណ្ឌិត ស្តេហ្វាន់ ហាន់ហ្សឺលម៉ាន់ ប្រធានក្រុមការងារ GIZ – ICONE លោក លោកស្រីតំណាងក្រុមប្រឹក្សាអភិវឌ្ឍន៍កម្ពុជា និងមជ្ឈមណ្ឌលសហប្រតិបត្តិការកម្ពុជា−សឹង្ហបូរី ថ្នាក់ដឹកនាំ តំណាងមន្ទីរអង្គភាពពាក់ព័ន្ធ ដែលជាសមាជិកក្រុមការងារកម្មវិធី ICONE ថ្នាក់ខេត្ត រួមមានខេត្ត បន្ទាយមានជ័យ បាត់ដំបង និងសៀមរាប លោក-លោកស្រីតំណាងសមាគមអាជីវកម្ម ក្រុមហ៊ុន សហគ្រាសដែលបានអញ្ជើញចូលរួមសិក្ខាសាលា សាលប្រជុំសាលាខេត្តបន្ទាយមានជ័យថ្ងៃទី២៣ ខែសីហា ឆ្នាំ២០២៣ ។
ក្នុងឱកាសនោះឯកឧត្តម អ៊ុំ រាត្រី ជំរុញដល់គ្រប់ភាគីពាក់ព័ន្ធរួមគ្នាដោះស្រាយនូវ រាល់បញ្ហាប្រឈមនានាក្នុងដំណើការអភិវឌ្ឍ រវាងរដ្ឋនិងវិស័យឯកជន ព្រោះថាវិស័យឯកជន បានដើរតួនាទីយ៉ាងសំខាន់ ជាដៃគូរបស់រាជរដ្ឋាភិបាល ក្នុងកិច្ចការអភិវឌ្ឍ តាមរយៈការបង្កើតការងារ ការផ្តល់ទំនិញ និងសេវាកម្ម ព្រមទាំងជំរុញកំណើនសេដ្ឋកិច្ចជាដើម ។
ឯកឧត្តមបញ្ជាក់ថា វិស័យឯកជន ក៏ជាតួអង្គដ៏សំខាន់មួយក្នុងការជំរុញ នវានុវត្តន៍ និងជាអ្នកបង្កើតដំណោះស្រាយប្រកបដោយប្រសិទ្ធភាព ដើម្បីដោះស្រាយបញ្ហាសេដ្ឋកិច្ច សង្គម និងបរិស្ថានដែលយើងជួបប្រទះ ។
ជាមួយគ្នានោះ ឯកឧត្តម អភិបាលខេត្ត ក៏បានថ្លែងអំណរគុណចំពោះ GIZ, ក្រុមប្រឹក្សាអភិវឌ្ឍន៍កម្ពុជា CDC, និងមជ្ឈមណ្ឌល សហប្រតិបត្តិការកម្ពុជា–សិង្ហបូរី ដែលបានផ្ដល់ការគាំទ្រដល់រដ្ឋបាលខេត្ត ក្នុងការបណ្តុះបណ្តាល កសាងសមត្ថភាព ក្នុងការអនុវត្តសកម្មភាពអភិវឌ្ឍនៅក្នុងខេត្ត ទាំងរដ្ឋនិងវិស័យឯកជន ហើយចំពោះមុខនេះ គឺកំពុងផ្តោតលើការអភិវឌ្ឍសហគ្រាស មកពីវិស័យទេសចរណ៍ ឧស្សាហកម្មធុនស្រាល ព្រមទាំងការកែច្នៃកសិផល និងចំណីអាហារជាដេីម ។
សូមបញ្ជាក់ផងដែរថា សិក្ខាសាលាដ៏នេះ ជាសិក្ខាសាលាមានលក្ខណៈ «សេរី» ពោលគឺ តាមលំដាប់នៃប្រធានបទ និងតាមទីកន្លែងនៃខេត្ត គោលដៅទាំង៣រួមមាន ខេត្តសៀមរាប បន្ទាយមានជ័យ និងបាត់ដំបង ៕