ឃាត់ខ្លួនយុវជន០៤នាក់ ក្រោយប្រេីប្រាស់កាំបិតខ្វែវកាប់ទៅលើយុវជន០២នាក់ រងរបួសធ្ងន់
បាត់ដំបង ៖ យុវជន ៤នាក់ ត្រូវបានកម្លាំងនគរបាលខេត្តបាត់ដំបង ធ្វើការបង្ក្រាបឃាត់ខ្លួន ក្រោយធ្វើសកម្មភាព ប្រើកាំបិតខ្វែវ កាប់ទៅលើយុវជន ២នាក់ផ្សេងទៀត បណ្តាលឲ្យរងរបួសធ្ងន់ ។
លោកវរសេនីយ៍ឯក ឈឿង គឹមសុង ស្នងការរងនគរបាលខេត្តបាត់ដំបង បានឲ្យដឹងថា ជនសង្ស័យមានឈ្មោះ ១-ឈ្មោះ ហាំម៉ាត់ យ៉ាព្រី ភេទប្រុស អាយុ ១៥ឆ្នាំ, ២-ឈ្មោះ ញឹម សារត្ន័ ហៅ សត់ ភេទប្រុស អាយុ ១៥ឆ្នាំ, ៣- ឈ្មោះ ហឿន កុសល ហៅ ឆេះ ភេទប្រុស អាយុ ១៩ឆ្នាំ, ៤-ឈ្មោះ ឆេង សុថន់ ហៅ វុធ ភេទប្រុស អាយុ ១៥ឆ្នាំ ។ ទាំង៤នាក់ ត្រូវបានកម្លាំងជំនាញ ធ្វើការឃាត់ខ្លួនកាលពីថ្ងៃទី ០៥ ខែ ឧសភា ឆ្នាំ ២០២៣ វេលាម៉ោង ២៣និង៣៨នាទី នៅចំណុចលេីសួនច្បារសម្តេចក្រឡាហោម ស្ថិតនៅក្នុងភូមិរំចេក៥ សង្កាត់រតនៈ ក្រុងបាត់ដំបង ជាមួយម៉ូតូម៉ាកហុងដាឌ្រីមសេ១២៥ ពណ៌ខ្មៅ ចំនួន ០២គ្រឿង ។
លោកបញ្ជាក់ថា កាលពីថ្ងៃទី០៣ ខែឧសភា ឆ្នាំ ២០២៣ វេលាម៉ោង ០២និង៤០នាទី នៅចំណុចមុខវិទ្យាស្ថានបច្ចេកវិទ្យាបាត់ដំបង ( សាលាតិចណូ ) ក្រុមជនសង្ស័យខាងលេី បានធ្វេីសកម្មភាពប្រេីប្រាស់កាំបិតខ្វែវកាប់ទៅលេីជនរងគ្រោះ ចំនួន០២នាក់ មានឈ្មោះ រាត្រី សូរិយា ភេទប្រុស អាយុ១៦ឆ្នាំ មានទីលំនៅភូមិព្រែកអំពរ ឃុំអណ្តេីកហែប ស្រុករតនមណ្ឌល ខេត្តបាត់ដំបង បណ្តាលឲ្យរងរបួស ដាច់សរសៃកែងជេីងខាងឆ្វេង មុតចង្កេះពីក្រោយប្រវែង ០២សង់ទីម៉ែត្រ និងដាច់ម្រាមដៃចង្អុលខាងឆ្វេង និងម្នាក់ទៀត ឈ្មោះ ស៊ីថា ពុទ្ធារ៉ា ភេទប្រុស អាយុ២០ឆ្នាំ មានទីលំនៅភូមិបឹងរាំង សង្កាត់អូរម៉ាល់ ក្រុងបាត់ដំបង បណ្តាលឲ្យខូចខាតម៉ូតូ ជនរងគ្រោះខូចខាតស្តុបខាងក្រោយ នឹង ស្លាកលេខ មូលហេតុ គឺ ផ្តើមឡើងពីការរាំឌឺដងដាក់គ្នានៅក្នុងក្លឹប ។
បច្ចុប្បន្នជនសង្ស័យទាំង៤នាក់ ត្រូវបានការិយាល័យជំនាញកសាងសំណុំរឿង បញ្ជូនទៅសាលាដំបូងខេត្តបាត់ដំបងចាត់ការបន្តតាមនីតិវិធី ៕
ដោយ ៖ សាលី