កសិករម្នាក់ ត្រូវរន្ទះបាញ់ស្លាប់ ខណៈកំពុងគ្របស្រូវពូជនៅពេលភ្លៀងខ្លាំង

បន្ទាយមានជ័យ ៖ បុរសម្នាក់ត្រូវបានរន្ទះបាញ់បណ្តាលឲ្យស្លាប់ភ្លាមៗនឹងកន្លែង នៅយប់ថ្ងៃទី១៥ ខែមេសា ឆ្នាំ២០២៣ វេលាម៉ោង១១យប់ នៅចំណុចស្រណាលចាស់ ភូមិស្រណាល ឃុំឃុំសំបួរ ស្រុមង្គលបូរី ខេត្តបន្ទាយមានជ័យ ។

សេចក្តីរាយការណ៍ បានឲ្យដឹងថា ជនរងគ្រោះមានឈ្មោះ ទឹម រុងរឿង ភេទប្រុស អាយុ៣៨ឆ្នាំ មានទីលំនៅភូមិស្រណាល ឃុំសំបូរ ស្រុកមង្គលបូរី ខេត្តបន្ទាយមានជ័យ ។ ហើយបើតាមព័ត៌មានពីប្រពន្ធ បានប្រាប់ថា នៅវេលាម៉ោងប្រហែល១១យប់ ពេលមេឃកំពុងភ្លៀង ឈ្មោះ ទឹម រុងរឿង ជាស្វាមី បានចុះពីខ្ទបចាំគោ ទៅគ្របស្រូវដែលទុកបំរុងពូជ ត្រៀមសម្រាប់បង្កបង្កើតផល នៅដើមរដូវវស្សាខាងមុខ ។

ប្រភពបន្តថា ក្រោយពេលនាងបានលឺសម្លេងរន្ទះបាញ់លាន់លឺយ៉ាងខ្លាំង ធ្វើឲ្យនាងបារម្ភហើយក៏ បានចុះទៅមើលប្តី ។ ពេលនាងឆួលពិលត្រង់កន្លែងប្តីគ្របស្រូវស្រាប់តែឃើញប្តីនាង ដេកស្លាប់ស្តូកស្តឹងបាត់ទៅហើយ ។

ក្រោយកើតហេតុភ្លាម ៗ បងប្អូនញាតិមិត្ត បានរាយការណ៍ការជូនសមត្ថកិច្ច ដើម្បីធ្វើកោសល្យវិច័យលើសាកសព បន្ទាប់មកក៏បានរៀបចំធ្វើបុណ្យតាមប្រពៃណី ៕

ដោយ ៖ ចំរើន