ឃាត់ខ្លួនជនសង្ស័យ ៣នាក់ ក្រោយធ្វើសកម្មភាពគាស់ទម្លុះទម្លាយ លួចយកទ្រព្យសម្បត្តិ
បាត់ដំបង ៖ ជនសង្ស័យ ចំនួន០៣នាក់ ត្រូវបានកម្លាំងក្រុមអន្តរាគមន៍បង្ការបង្ក្រាប នៃស្នងការដ្ឋាននគរបាលខេត្តបាត់ដំបង ធ្វើការបង្ក្រាបឃាត់ខ្លួន ពាក់ព័ន្ធ ករណីលួចមានស្ថានទម្ងន់ទោស (គាស់ទ្វារផ្ទះលួចយកទ្រព្យសម្បត្តិ) ។
លោកវរសេនីយ៍ឯក ឈឿង គឹមសុង នាយការិយាល័យនគរបាលព្រហ្មទណ្ឌកម្រិតស្រាល បានអោយដឹងថា កិច្ចប្រតិបត្តិការខាងលើនេះធ្វើឡើងកាលពីវេលាម៉ោង ១៦និង២០នាទី ថ្ងៃទី ៣១ ខែធ្នូ ឆ្នាំ២០២២ នៅចំណុចភូមិទួលតាឯក សង្កាត់ទួលតាឯក ក្រុងបាត់ដំបង ខេត្តបាត់ដំបង និងបានធ្វេីការនាំខ្លួនជនសង្ស័យ០១នាក់ ឈ្មោះ មឿន ចាន់ថន ភេទប្រុស អាយុ៣៤ឆ្នាំ មានទីលំនៅភូមិទួលតាឯក សង្កាត់ទួលតាឯក ក្រុងបាត់ដំបង ។
ក្រោយបានធ្វេីការឃាត់ខ្លួន សាកសួររួច កម្លាំងយេីងបានធ្វេីការស្រាវជ្រាវ រហូតឈានដល់ធ្វេីការឃាត់ខ្លួនជនសង្ស័យ បានចំនួន ០២នាក់ទៀត នៅថ្ងៃទី០១ ខែមករា ឆ្នាំ២០២២៣ វេលាម៉ោង ១១និង៤០នាទី នៅចំណុចភូមិទួលតាឯក សង្កាត់ទួលតាឯក ក្រុងបាត់ដំបង ដែលជនសង្ស័យទី១-ឈ្មោះ ភិន ថាវី ភេទប្រុស អាយុ៣៦ឆ្នាំ និងទី២-ឈ្មោះ តូច សុភាសិត ហៅ ពៅ ភេទប្រុស អាយុ៣៨ឆ្នាំ ទាំងពីរនាក់មានទីលំនៅភូមិទួលតាឯក សង្កាត់ទួលតាឯក ក្រុងបាត់ដំបង និងវត្ថុតាងដកហូតរួមមាន ៖ ទ្វារឈេី ០៥ សន្លឹក, ក្តារឈេី ចំនួន០២សន្លឹក, ឈេីគ្រែប្រអប់ ចំនួន០២សន្លឹក, ឈេី ០៤ដុំ, ម៉ូតូ ០១ គ្រឿង ម៉ាកស៊ូស៊ូគីវីវ៉ា ពណ៌ ក្រហម ស៊េរីចាស់គ្មានស្លាកលេខ ។
គួររំលឹកថា កាលពីថ្ងៃទី៣០ ខែធ្នូ ឆ្នាំ២០២២ វេលាម៉ោង ០០និង០២នាទី នៅចំណុចភូមិដង្កោទាប សង្កាត់ទួលតាឯក ក្រុងបាត់ដំបង ជនសង្ស័យខាងលើ រួមជាមួយបក្សពួក ចំនួន០២នាក់ទៀត ដែលកំពុងរត់គេចខ្លួន បានធ្វេីសកម្មភាពផ្លោះរបង ចូលគាស់ផ្ទះ លួចយកទ្រព្យសម្បត្តិរបស់ ជនរងគ្រោះឈ្មោះ ឆេង គឹមលាង ភេទស្រី អាយុ៤៥ឆ្នាំ មានទីលំនៅភូមិកំពង់ក្របី សង្កាត់ស្វាយប៉ៅ ក្រុងបាត់ដំបង ដែលសម្ភារៈបាត់បង់រួមមាន ៖ ទ្វារឈេី ចំនួន ០៥ សន្លឹក, គ្រែ ឈេី ចំនួន ០១, ឈេីធ្នង់ ចំនួន ០៨ ដុំ, ទ្វារដែក ចំនួន ០៤, ទ្រុងដែក ចំនួន ០១, ជេីងម៉ាស៊ីនដេរ ចំនួន ០១, គម្របម៉ាស៊ីន ត្រាក់ទ័រចំនួន ០១ ។
ក្រោយឃាត់ខ្លួន ជនសង្ស័យខាលើរហូតមកដល់ពេលនេះ ត្រូវការិយាល័យជំនាញកំពុងធ្វេីការកសាងសំណុំរឿង ដេីម្បីបញ្ជូនទៅសាលាដំបូងខេត្តបាត់ដំបង ចាត់ការបន្តតាមនីតិវិធី ៕
ដោយ ៖ សាលី