សន្តិសុខ និង សង្គម
មានការលួចបើកបង្កប់ល្បែងស៊ីសងខុសច្បាប់ នៅអគារថកសិនធ័រ៍ ជាន់ទី២
ភ្នំពេញ៖ សេចក្ដីរាយការណ៍ បានបញ្ជាក់ថា មានការលួចបើកល្បែងស៊ីសងខុសច្បាប់ចម្រុះ ប្រមូលផ្ដុំមនុស្សជាច្រើន ស្ថិតនៅទីតាំងអគារយីហោ «ថកសិនធ័រ៍» ជាន់ទី២ ភ្នាល់ដាក់លុយធំៗ ធ្វើឱ្យប៉ះពាល់ដល់ពលរដ្ឋ។
ប្រជាពលរដ្ឋដែលមិនចូលចិត្ត និងរងផលប៉ះពាល់ពីល្បែងខុសច្បាប់នេះ បានសំណូមពរដល់អាជ្ញាធរពាក់ព័ន្ធ ជាពិសេសអាជ្ញាធរមូលដ្ឋានខណ្ឌចំការមន គួរមានវិធានការបង្ក្រាបឱ្យទាន់ពេលវេលាផងដែរ ដើម្បីរក្សាគោលនយោបាយភូមិសង្កាត់មានសុវត្ថិភាពរបស់ក្រសួងមហាផ្ទៃ។
ជាក់ស្ដែងទីតាំងលួចបើកល្បែងស្ថិតនៅអគារ ថកសិនធ័រ៍ ក្បែរនឹងក្រសួងបរិស្ថាន នៅជាន់ទី២ បន្ទប់លេខ២០៧ តាមបណ្ដោយស៊ីសុវត្ថិ មូលដ្ឋានសង្កាត់ទន្លេបាសាក់ ខណ្ឌចំការមន រាជធានីភ្នំពេញ មានឈ្មោះ ឆាយ បាននឹងកំពុងលួចបើកល្បែងស៊ីសងខុសច្បាប់ចម្រុះភ្នាល់ដាក់ធំៗ ខណៈម្ចាស់អគារ «ថកសិនធ័រ៍» មិនបានផ្ដល់កិច្ចសហការ ឫអនុញ្ញាតឱ្យបើកល្បែងស៊ីសងនោះទេ ។
ពាក់ព័ន្ធការចោទប្រកាន់នេះ យើងទូរស័ព្ទសុំការបញ្ជាក់ពីឈ្មោះ ឆាយ បានឱ្យដឹងថា មិនមែនរូបលោកបើកនោះទេ ហើយលោកធ្លាប់លេងតាមកាស៊ីណូ ជាមួយម្ដាយអាក្មេងម្នាក់វារាយការណ៍ និងបង្ហោះបណ្ដេញសង្គម តែឥលូវគាត់រវល់រឿងដីធ្លី ។
ពាក់ព័ន្ធករណីនេះ អ្នកព័ត៌មានយើង បានទាក់ទងទៅ លោក យស យុទ្ធី អភិបាលរងខណ្ឌចំការមន លោក បានឲ្យដឹងថា លោកនឹងស្រាវជ្រាវ ដាក់កម្លាំងចុះបង្ក្រាប៕